Mobilizacións

Eu vou á mani porque o País non é noso, e moito menos dos que mandan. Pensan que porque os puxemos no poder non podemos quitalos, estabamos mal e agora estamos peor. Vou á mani simplemente porque é un toque de atención a este estupendo goberno en vísperas: hai cousas coas que non se negocia e Galiza é unha desas cousas. -Rocío Candales, mestra

...consideramos que este mundo non nos pertenece senón que é a herdanza dos nosos fillos. -Plataforma Contra a Variante Interior de Noia

Este domingo 17 ás 12:00 horas tes unha cita en Compostela: Unha cita para berrar ben alto pola defensa do noso territorio e da nosa cultura. Unha cita para chamar a atención a unha clase política que non cambia as súas maneiras ao servizo dos intereses duns poucos e que independentemente da súa cor, continúa a darlle as costas á cidadanía.

Este domingo 17 ás 12:00 horas tes unha cita en Compostela:

Contra as canteiras no Courel, contra a desfeita urbanística da costa, contra o plan acuícola, contra a instalación de industrias perigosas entre as casas dos veciños, a especulación, a desfeita. Contra as mentiras e a prepotencia propias do PP de toda a vida, e contra a decepción intolerable do goberno bipartito.

Este domingo 17 ás 12:00 horas tes unha cita en Compostela:

...Nos gusta Galiza e nom nos gustam as desfeitas. E porque como vezinhas estamos preocupadas nom só polo que ocorre no nosso bárrio senóm tamém máis alá. -Maria e Branca, Associaçom Vezinhal As Marias, Compostela

 ...Som galego e lhe quero á minha terra. Porque despois dum cámbio político no que puxemos esperanzas estamos pior do que estavamos. -Jose Silva, taberneiro

...Porque chegou o momento da cidadanía. Porque as estruturas tradicionais de poder non só non están respostar ás agresións ao medio, senón que as promoven directamente, ben por desleixo ben por convicción.-Verdegaia

Porque a legalidade só é vixente para os menos poderosos; porque a cidadanía ten pechadas as portas da participación real na definición de que país queremos mentres que o lobby político económico campa pola administración ao seu capricho; porque rexeitamos un sistema económico depredador e insustentábel; porque queremos unha Galiza que sexa un referente en sustentabilidade ecolóxica e xustiza social, que non parasite outros territorios e pobos e que asuma que so somos usufrutuarios do territorio non só galego senón planetario, a penas caseiros e caseiras das xeracións futuras.